Dumating ngayong araw (Mayo 7) ang karagdagang 1.5 milyong doses ng bakunang CoronaVac ng Sinovac Biotech na binili ng gobyerno.
Ang mga bakuna, lulan ng chartered Flight 5J671 mula Tsina, ay lumapag sa NAIA Terminal 2 bago mag-8:00 n.u.
Ito ang ikapito at pinakamalaking bultong dumating sa bansa, at gagamitin ito para sa 750,000 katao.
Ayon kay Health Secretary Francisco Duque III, mapapabilis ng tuloy-tuloy na pagdating ng mga bakuna ang pagkamit ng herd immunity.
Sinabi naman ni vaccine czar Secretary Carlito Galvez Jr. na ibibigay ang mga bagong dating na bakuna sa priority areas, kabilang ang Metro Manila na may nakalaang 800,000 doses.
Sa kabuuan, 5,540,600 doses ng bakuna kontra COVID-19 ang dumating na sa bansa, Ang 1,525,600 doses ay donasyon mula sa Tsina at COVAX Facility, at 4,015,000 naman ay binili ng gobyerno.
Kaugnay nito, pinasinayaan ng Pamahalaan ng Pasay ang isang giga vaccination center kung saan isinagawa ang simulation ng pagbabakuna ng mga 500 na senior citizen.
Target ng lokal na pamahalaan ang makapagbakuna rito ng 2,000 tao kada araw, ayon sa suplay ng bakuna.
Samantala, pinag-aaralan na ng IATF-EID ang paggamit ng magkaibang brand ng bakuna sa isang tao, at ang pagpapababa sa edad ng mga babakunahan. – Ulat ni Kenneth Paciente/AG-jlo
Panoorin ang ulat ni Kenneth Paciente:
