Posibleng mababakunahan na ang mga indibidwal na nabibilang sa priority list A4 at A5, lalo na sa mga lugar na may kritikal na kaso ng COVID-19 tulad ng National Capital Region, Bulacan, Cavite, Pampanga, Laguna, Batangas, Rizal, Metro Cebu, at Metro Davao.
Ayon kay Presidential Spokesperson Harry Roque sa kanyang public briefing noong Mayo 17, “Inuna natin ang A1, A2, at A3, at plano natin na hanggang katapusan ng Mayo ay A1, A2, at A3. Pero pagdating ng 3rd quarter beginning June or possibly a bit earlier ay hanggang A4 at A5 ay mababakunahan na nang sabay-sabay.”
Base naman sa pakikipagpulong ni Senator Christopher “Bong” Go sa mga opisyal ng ehekutibo at pinuno mula sa mga pribadong sektor noong Mayo 16, inaalam nito ang mga pamamaraan upang mapabilis ang pag-rollout ng mga bakuna sa bansa.
Kabilang sa mga nasa A4 priority group ang mga frontliner at essential workers, at nasa A5 category naman ang mga indigent population.
Giit ng senador, dapat mauna ang mga ipinangako ng Pangulo na babakunahan ang mga “isang kahig-isang tuka” na lumalabas ng bahay para buhayin ang kanilang pamilya gaya ng mga nasa A5 category.
Ayon pa sa senador, kapag nagsimula na ang pagbabakuna sa A4 at A5 category ay maari nang magkaroon ng express lanes sa mga natitira pang A1 hanggang A3 na hindi pa rin nababakunahan, hanggang sa maabot ng bansa ang herd immunity.
– (PTV News) / CF-jlo
