Iniimbestigahan na ng Quezon City government ang kapitan ng barangay at isang presidente ng homeowners association sa Brgy. Matandang Balara dahil sa isang pagtitipon sa lugar noong nakaraang buwan.
Ayon sa otoridad, ang nasabing pagtitipon at inuman ay nagresulta sa pagkalat ng COVID-19 sa 72 katao sa lugar.
Ang imbestigasyon kay Brgy. Captain Allan Franza at Homeowners Association President Don Brabante ay dahil umano sa pagkabigong pagbawalan o pagsumbong sa nasabing pagtitipon.
“The spread could’ve been prevented but we see that some people, including persons in authority, have started to become lax in the enforcement and practice of minimum health protocols,” ani Mayor Joy Belmonte sa isang pahayag noong Hunyo 6.
Naglabas na ang City Legal Office ng show cause order kay Franza, habang nagsampa naman sila ng reklamo kay Brabante dahil sa paglabag umano nito sa health protocols.
Sinabi ni Franza na handa siyang humarap sa imbestigasyon, pero nanindigan itong ginawa nila ang kanilang tungkulin. Aniya, pinagbawalan nila ang ikakasal sa hiling nitong magdaos ng reception.
Sumagot na rin siya sa show cause order at isinaad na nagsampa na sila ng kaso laban sa ikinasal dahil nagpumilit sila sa kanilang pagtitipon.
“Nai-file na po namin sa City Prosecutor’s Office, hinihintay na lang po namin ang kanilang tugon tungkol dun sa isinampa ng barangay na reklamo,” ani Franza.
Sinubukan naman ng PTV News na kunin ang pahayag ni Brabante, pero wala pa siyang tugon. – Ulat ni Allan Francisco/AG-rir
Panoorin ang buong ulat:
