By May Diez | Rasyo Pilipinas Butuan
Sinang-ayunan ng lahat ng miyembro ng Sangguniang Panlungsod ang Resolution No. 521-2021 sa isinagawang session kahapon, kung saan isinailalim ang Butuan sa ‘State of Calamity’ dahil malaking bahagi ng lungsod ang naapektuhan ng bagyong Odette.
Maraming poste ang natumba kaya’t 16 na barangay ang nawalan ng kuryente, napinsala din ang pipeline ng source ng supply ng tubig, at mahigit 201,000 ng high-risk population ay naapektuhan.
Mahigit 4,000 pamilya ang naitalang lumikas nang dahil sa pagbaha at pagguho ng lupa.
Sa ngayon ay may mga nakauwi na sa kanilang mga pamamahay pero may iilan pa ring nananatili sa evacuation center.
Ipinaabot naman ng LGU Butuan ang pasasalamat sa Agusan Filipino-Chinese Chamber of Commerce and Industry at iba pang pribadong kumpanya sa ibinigay na tulong gaya ng pagpapahiram ng 70 modular tents para sa mga lumikas.
Ipinagamit din ng Father Saturnino Urios University ang kanilang gym bilang karagdagang evacuation center.
Habang ang Red Cross Butuan chapter bukod sa itinayong first-aid station, nagpakain ng arrozcaldo sa mga lumikas.
Nagtulungan din ang City Engineering Office at DPWH Butuan District sa clearing operations at tiniyak na passable na ang lahat ng mga daan. (Radyo Pilipinas) -bny
