Sinimulan na ng mga operatiba ng National Bureau of Investigation (NBI) ang pag-iimbestiga sa pagkamatay ng isang 17-anyos matapos ‘manlaban’ umano ito sa isinagawang operasyon ng pambansang pulisya sa Caloocan noong nakaraang linggo.
Ayon sa ama ng biktima na si Saldy Delos Santos, nagtungo na ang mga tauhan ng NBI sa kanilang tahanan at sa pinangyarihan ng krimen upang makapangalap ng kaukulang ebidensya at makausap na rin ang mga residenteng malapit sa pinangyarihan ng insidente.
Samantala, sa hiwalay na operasyon ng Caloocan Police, nadakip at kasalukuyang hawak na ng Pulisya ang tulak na umano’y nakatransakyon ni delos Santos na si Renato “Nonong” Loveras.
Saad ni Loveras, dalawa hanggang tatlong beses niyang nakatransaksyon si delos Santos at mismong ang binatilyo ang nag-abot sa kaniya ng shabu galing sa isang nagngangalang Neneng Escupin.
Sinabi naman ng hepe ng Caloocan City Police na si Senior Superintendent Chito Bersaluna na wala si delos Santos sa drug watch list, ngunit dahil sa pahayag ni Loveras ay napabilang sa drug runner ang binatilyo.
Matatandaan noong ika-16 ng Agosto, nagsagawa ng ‘One-time, Big-time’ operation ang mga kawani ng Caloocan City Police kung saan napaslang ang estudyanteng si Kian Loyd Delos Santos matapos makipagbarilan umano ito sa mga pulis.
Hindi naman kumbinsido ang mga kaanak ni Kian na may baril ang binata matapos nilang mapanuod ang kuha ng CCTV ng barangay hall ilang metro ang layo sa lugar na pinangyarihan ng barilan. Dagdag pa ang mga lumitaw na testigo kung saan nakita umano ang nangyaring pagpaslang kay Delos Santos.
Sa kabilang banda, nagpahayag naman nang pagsuporta ang Department of Education (DepEd) sa direktiba ni Pangulong Rodrigo Duterte na dapat manaig ang ‘rule of law’ at panagutin ang sinumang responsable sa pagkamatay ng Senior High School student na si Kian. | Angelica Bobiles – PTV
PANOORIN ANG FULL REPORT NG PTV:
