By Racquel Bayan | Radyo Pilipinas
Nagpapatuloy ang pag-iikot at pag-inspeksiyon ni Pangulong Rodrigo Roa Duterte sa mga lugar na sinalanta ng bagyong Odette.
Sa pagbisita ng Pangulo sa Dinagat Islands, inatasan niya ang National Housing Authority (NHA) na maglaan ng P100 milyong housing assistance para sa mga biktima ng bagyo na napinsala ang mga tahanan.
Ayon kay acting Presidential Spokesperson Sec. Karlo Nograles, inatasan rin ng Pangulo ang Department of Social Welfare and Development (DSWD) na magpaabot ng tulong pinansiyal sa mga residente sa lugar, bukod pa sa food packs na ipinamamahagi ng tanggapan.
“The Department of the Interior and Local Government will monitor and supervise the distribution of the aforesaid financial assistance,” ani Nograles.
Sa pakikipag-usap ni Pangulong Duterte sa mga evacuee at local officials sa lugar, tiniyak niya na minamadali na ng lahat ng tanggapan ng pamahalaan ang clearing operations sa mga kalsada, at pagpapaabot ng suporta upang mapabilis rin ang konstruksiyon ng tahanan ng mga ito.
Samantala, ngayong hapon naman ay nag-iikot ang Pangulo sa Palawan at Cebu upang personal na alamin ang sitwasyon sa mga lugar na ito. (Radyo Pilipinas) – jlo
