Kasalukuyang nagaganap ang pagpupulong ng ilang miyembro ng IATF-EID upang talakayin ang quarantine classification na papairalin sa bansa sa susunod na buwan.
Kasama sa mga pag-uusapan ay kung ipagpapatuloy pa ang implementasyon ng modified enhanced community quarantine (MECQ) sa mga lugar sa National Capital Region Plus sa kabila ng pagdami ng mga kaso ng covid-19.
Ang OCTA Research Group ay nananawagan ng karagdagang isang linggo para sa MECQ upang mapababa pa ang mga kaso, mabawasan ang pasyente sa ospital, at mabigyan ng sapat na oras ang mga programa laban sa covid-19.
Ganito rin ang naunang mungkahi ni Health Secretary Francisco Duque III base sa kaniyang personal na obserbasyon.
“Ang tala nga ng OCTA, we need 2 to 4 more weeks of MECQ. Pero sa ngayon, we’re arguing for one additional week, tingnan natin. And then kung ‘di talaga bababa, we will argue for another week,” giit ni political analyst Assistant Prof. Ranjit Rye ng University of the Philippines.
Ayon naman kay Presidential Spokesperson Harry Roque, masusing pag-aaralan ng IATF-EID kung ano ang kanilang magiging rekomendasyon bago nila ito ihain kay Pangulong Rodrigo Duterte sa Miyerkules.
“Mahirap po talaga ang desisyon, pero magkakaroon po ng mahaba at saka thorough na balitaktakan mamayang hapon at ang tingin ko po ang rekomendasyon will be a reasoned recommendation to the President,” paliwanag ni Roque nitong Martes sa kanyang press briefing.
Kapasidad ng mga ospital, binabantayan
Bilang tugon sa sitwasyon, isa sa mga lubos na tinututukan ngayon ng gobyerno ang pagpaparami ng intensive care units (ICU) sa bansa.
Samantala, tiniyak ni Roque ang pagdating ng mga bagong vaccine supply na Sputnik V mula sa Russia at karagdagang Sinovac na malaki aniyang tulong para sa programa sa pagbabakuna. – Ulat ni Mela Lesmoras/AG-jlo
