Nanindigan ang Malacañang na hindi nagpabaya ang gobyerno sa kabila ng pagtaas ng bilang ng kaso ng covid-19 sa bansa na ngayon ay nasa mahigit isang milyon na.
Ayon kay Presidential Spokesperson Harry Roque, hindi lang naman Pilipinas ang nakararanas ng pagtaas ng kaso. Dagdag pa niya, nananatiling maayos ang paghawak ng gobyerno sa sitwasyon.
“Huwag ninyo pong titingnan lamang ang 1 million cases. Unang-una, halos 900,000 na po ang gumaling diyan,” sabi ni Roque sa kanyang press briefing noong Lunes.
“So I don’t think it is a negative reflection. On the other hand, dahil nga po mayroon tayong world ranking, makikita po natin na we are managing still the new variants rather well,” dagdag ni Roque.
Iginiit ng opisyal na epektibo ang naging implementasyon ng enhanced community quarantine (ECQ) at kasalukuyang modified ECQ sa National Capital Region Plus Bubble.
Inaasahang ia-anunsyo ni Pangulong Rodrigo Duterte sa Miyerkules kung ano ang kahihinatnan ng quarantine protocols sa buong bansa ngayong malapit nang matapos ang klasipikasyon sa buwan ng Abril.
“Ang tinitingnan po natin iyong two-week attack rate, iyong daily attack rate, at saka iyong healthcare utilization rate,” saad ni Roque.
Panoorin ang ulat ni Mela Lesmoras:
Ayon naman kay Health Secretary Francisco Duque III, pabor siyang palawigin pa ang pagpapatupad ng modified ECQ sa Kalakhang Maynila na siya namang sinuportahan ng isang eksperto.
“Without accountability or visibility on these indicators, I would say na we’re not yet ready for a GCQ [general community quarantine],” sabi ni Dr. John Wong, na isang eksperto sa epidemiology.
Inihayag ng dalubhasa na kailangan ang mahigpit na pagbabantay ng mga munisipalidad sa pagpapatupad ng minimum health standards, mabilis na pagtugon sa mga taong may sintomas, at ang pagpapataas ng bilang ng nababakunahan. – Ulat ni Mela Lesmoras/AG-jlo
