By Julius Gonzales | Radyo Pilipinas
Pinayuhan ng isang eksperto sa infectious disease ang publiko na huwag munang magpaturok ng fourth dose ng bakuna kontra COVID-19.
Sinabi ni Dr. Edsel Salvana na hindi pa tiyak ang pagiging epektibo ng ikaapat na dose at ang posibleng side effects nito.
Kailangan pa aniyang masusing pag-aralan kung kailangan pa ba ng fourth dose ng COVID-19 vaccine.
Ayon pa kay Dr. Salvana, mayroon nang ginagawang pag-aaral ngayon para sa tinatawag na next generation vaccines na mas magiging epektibo pa kalaunan kaysa sa ikaapat na dose.
Sinabi pa ni Dr. Salvana na ang mahalaga sa ngayon ay makakuha ng primary dose ng bakuna upang makatanggap ng sapat na proteksiyon, at ang booster dose na nakapagbibigay pa ng dagdag na proteksiyon laban sa malalang kaso ng COVID-19.
Kung sakaling dumating sa punto na makakita ng basehan at ebidensya para payagan ang fourth dose, sinabi ni Salvana na baka ibigay na lamang ito sa mga target sector o sa mga healthcare workers na mataas ang exposure sa virus, sa mga senior citizen, at may comorbidity.
Sa ngayon, ani Dr. Salvana, ay wala pa naman siyang nababalitaan na mayroon nang mga indibidwal na nagpaturok na ng fourth dose sa Pilipinas. (Radyo Pilipinas)
-ag
