By Jesson Tamondong | Radyo Pilipinas
Inihayag ng National Electrification Administration (NEA) na patuloy ang pagtaas ng halaga ng naitatalang pinsala ng bagyong Odette sa mga electric cooperative sa bansa.
Ayon sa pinakahuling tala ng NEA Disaster Risk Reduction Management Department, umakyat na sa P300 milyon ang halaga ng napinsala ng bagyong Odette sa mga electric cooperative, partikular na sa mga lugar sa Visayas na lubhang sinalanta ng bagyo.
Ayon sa ahensya, patuloy pang pumapasok ang ulat ng ibang kooperatiba tungkol sa pinsala na natamo ng mga ito dahil sa bagyo.
Samantala, unti-unti na aniyang naibabalik ang suplay ng kuryente sa ilang bayan sa hilagang bahagi ng Cebu, kasalukuyan na rin aniyang puspusan ang ginagawang pagsasaayos ng mga transmission line sa ibang bahagi ng Cebu, upang maibalik ang suplay ng kuryente. -rir
