Nagpapasalamat po tayo sa mga may mabubuting kalooban na nagtatayo ng mga community pantry sa ating lungsod dahil sa hangarin nilang makatulong sa ating mga kapos-palad na mga kababayan.
Ang ginagawa po nila ay pagpapakita na buhay na buhay pa rin sa ating mga Pilipino ang diwa ng Bayanihan.
Ang Bayanihan at pagtulong sa kapwa ay isa sa mga mabubuting ugali na likas sa ating mga Pilipino kaya nakakatuwa na muli natin itong binubuhay sa panahong ito sa pamamagitan ng mga community pantry, upang sama-sama natin labanan at talunin ang pandemya.
Pakiusap ko lamang po na gawin natin ito na may kaayusan kaya dapat ay makipag-ugnayan muna ang mga organizer sa mga barangay kung saan nila ito itatayo.
Maliban sa may kaayusan dapat ay sundin pa rin ang ipinatutupad na basic health protocols kung kaya mahalaga ang koordinasyon sa barangay para matulungan sila na mapanatili ang kaayusan sa pila.
At siempre po paulit-ulit ko pa ring sasabihin sa ating mga mamamayan na gawin ang kaukulang pag-iingat at huwag kalimutan ang ating EMI Habit o Ensure to wash your hands, Must wear mask and face shield, and Implement Physical Distancing.
Sa mga organizer po ay maaari rin kayong magtakda ng oras sa umaga at hapon upang malaman ng mga tao kung anong oras sila pupunta.
Sa huli ay maraming salamat po sa inyong mabuting hangarin na makatulong sa panahon ng kagipitan.
Pagpalain po tayo ng Panginoong Diyos!
