Naging matagumpay ang paglulunsad ng 12 obra ng Film Development Council of the Philippines (FDCP) sa ‘Pista ng Pelikulang Pilipino’ ngayong taon.
Ito ay dahil na rin sa mainit na pagsuporta ng mga manunuod na patuloy ang dumadagsa sa mga lokal na sinehan sa bansa.
Noong Martes ang itinakdang huling araw ng naturang pista ngunit dahil na rin sa mainit na pagtangkilik ng mga Pilipino, ang pagpapalabas ng mga pelikula ay magtutuloy-tuloy hanggang sa katapusan ng Agosto.
Nilinaw naman ni FDCP Chairman Liza Diño-Seguerra na magpapatuloy na lamang ang 12 pelikula sa piling mga sinehan bansa.
Inilathala rin ng FDCP Chair ang tatlo sa mga pinakamatataas na kumita sa pista ngayong taon kung saan napabilang ang “100 Tula Para Kay Stella”, “Patay na si Hesus”, at “Bar Boys”.
Ang tatlong pangunahing obra ng FDCP ay patuloy mapapanuod sa takilya ngunit hindi na kabilang sa PPP.
Dagdag pa ni Seguerra, ang natitirang siyam maliban sa “Ang Manananggal Sa Unit 23B” ay mapapanuod na lamang sa mga piling Cine Lokal.
Samantala, nakalikom naman ng higit sa P127 milyon at naungusan ang target ng ahensya na P100 milyon.
Dahil sa pagpapalawig ng PPP, inaasahang tataas pa ang kita ng 12 pelikula sa P200 milyon. | (Tina Joyce Laceda – PTV)
