Upang matiyak na maiiwasan at mababawasan ang aksidente sa paggawa at mahigpit na maipatupad ang pamantayan sa ligtas at malusog na manggagawa, inatasan ni Labor and Employment Secretary Silvestre H. Bello III ang Occupational Safety and Health Center (OSHC) ang pagsusuri at akreditasyon ng lahat ng safety practitioner at heavy equipment testing operators.
Sa ilalim ng Administrative Order No. 407, inilipat ni Bello sa OSHC ang tungkulin sa pagsusuri, pag-aproba at pagbibigay ng certificate of accreditation ng Occupational Safety and Health (OSH) Practitioners and Testing Organization for Construction Heavy Equipment (CHE) mula sa Bureau of Working Conditions (BWC) at DOLE Regional Offices (ROs).
Naatasan ang OSHC na magbuo at ipalahathala ang patakaran at manual of procedures para sa akreditasyon, at magkapareho at kontroladong sertipikasyon sa mga OSH Practitioners at Testing Organization for CHE.
Naatasan din ang OSHC na i-monitor ang kanilang mga gawain at bigyan ng karagdagang kasanayan at iba pang tulong teknikal para sa pagtataas ng kanilang kakayahan.
Samantala, ang lahat ng aplikasyon, pati ang ang renewal, na isinumite sa BWC at DOLE-RO bago Setyembre 7, 2017, o bago ang effectivity date ay ipo-proseso ng BWC at ng kinauukulang DOLE-ROs at ipadadala sa OSHC para sa pinal na pagpapatibay ng sertipikasyon.
Ipinalabas ang administrative order upang higit na maiwasan at tuluyang mabawasan ang aksidente sa trabaho at para sa mahigpit na pagpapatupad ng itinakdang patakaran para sa ligtas at malusog na manggagawa sa lahat ng lugar-paggawa. (DOLE-PR)
