By Angelie Tajapal | Radyo Pilipinas
Nasa 90 percent na ang madadaanan o passable na ang mga major road sa Cebu City, makalipas ang apat na araw mula ng hagupitin ng bagyong Odette ang Cebu.
Ayon kay Councilor Jery Guardo, Chairperson ng Committee on Infrastructure ng Cebu City Council, cleared na halos ang mga kalsada mula sa mga nakaharang na sanga ng mga naputol at natumbang punong kahoy.
Pansamantala muna nilang nilagay sa gilid ng daan ang mga naipong sanga at dahon ng kahoy. Nakahilera rin sa daan ang tambak na mga basura.
Ayon kay Councilor Guardo, target nilang malinis ang mga major road ngayong linggo at mahakot na rin ang mga nakatambak na basura sa daan.
Isusunod na rin nila ang inner roads, na hanggang ngayon ay may mga nakaharang pa rin na mga natumbang puno at poste ng kuryente.
Ipinaliwanag nito, na naging mabagal ang unang dalawang araw ng clearing operation, dahil halos lahat ng mga kawani ng city hall ay naapektuhan rin ng bagyo.
Nanawagan rin ang opisyal ng pang unawa sa publiko, at aniya kung maari ay magtulungan na lamang kahit man lang sa ginawagang clearing operations. (Radyo Pilipinas) -rir
