Alinsunod sa direktiba ng pamunuan ng PNP Bicol sa pamumuno ni Regional Director PBGen Jonnel Estomo, isang masusing imbestigasyon ang ngayon ay patuloy na ikinakasa patungkol sa nangyaring pagsabog sa loob ng campus ng Bicol University.
Alas sais y medya ng hapon ngayong araw, Oktubre 3, 2021 gumulantang ang dalawang magkasunod na pagsabog sa mga karatig na establisyemento ng nasabing paaralan.
Kaugnay nito, agad na rumisponde ang pinagsamang tauhan ng Regional Mobile Force Battalion 5 at Criminal Investigation Detection Group upang alamin ang dahilan at pinagmulan ng pagsabog. Sa lugar ng pinangyarihan nasaksihan ng mga responding police officers ang mga shrapnel mula sa ginamit na pasabog.
Inalerto rin ng PNP Bicol ang mga bumubuo ng Explosive Ordnance Disposal Team at Legazpi City Police Station upang matiyak ang seguridad sa lugar.
Sa kasalukuyan, mahigpit na tinututukan ng PNP Bicol ang nangyaring insidente para tukuyin ang nasa likod ng insidente at ang motibo ng pagpapasabog.
Samantala, ang buong hanay ng kapulisan sa Bicol ay nananatiling naka full alert status. Ito ay sa pagnanais tiyakin ang kaligtasan at kaayusan sa iba’t ibang bahagi ng rehiyon.
Sinisiguro ng PNP Bicol na sa gitna ng usaping ito, ang ahensya ay buo ang loob sa pagtupad ng kanilang tungkulin na bantayan ang pamayanan para mapanatiling tahimik at ligtas ang mga mamamayan sa pamamagitan nang paglulunsad ng police operations at kampanya laban sa banta ng kriminalidad. (PNP)-rir
