BAGUIO CITY—Saan pay a nabigbig ti kinasiasino ti nasarakan a bangkay ti maysa dagiti dua nga agtutubo a naiyanod iti Gayasi River sadiay Barangay Wangal, La Trinidad.
Nasarakan ti bangkay iti paset met laeng ti Gayasi River a naipit kadagiti batbato babaen kadagiti miembro ti Search and Retrieval Volunteers iti pasado alas-4 ti malem kalman.
Naalaan iti DNA sample ti bangkay ngem manamnama a maamuan ti resulta iti las-ud ti dua a bulan.
Maipalagip a mapapati a naiyanod iti karayan da Harley Rufino ken Romel Tadena kabayatan ti panagballasiwda iti Wangal Bridge babaen iti motorsiklo gapu iti napigsa a pegges ti danum idi dimmalapos ti nagpigsa a nepnep iti August 13.
Nasarakan laeng ti motorsiklo, helmet ken jacket iti karayan a kukua dagiti dua nga agtutubo.// Steven JC Bell
