Umapela si Senate Committee on Health Chairman Senator Christopher “Bong” Go na dapat maglaan ng tiyak na bakuna na kayang matugunan ang mga specific requirement ng mga bansang pupuntahan ng mga Overseas Filipino Workers (OFW).
Kinumpirma ng senador na umapela siya sa Pangulong Rodrigo Duterte, vaccine czar Secretary Carlito Galvez, Jr., at sa iba pang namumuno ng National Vaccination Program na ikonsidera ang pangangailangan ng mga OFW, pati ng mga seafarers, pagdating sa brand ng bakuna na tanggap sa lugar na pagtatrabahuhan nila.
Aniya, kabilang naman ang mga ito sa A4 priority group ng mga babakunahan.
Ipinaliwanag ni Go na ilan sa mga OFW ang nag-aalangan pa rin na magpabakuna dahil naghahanap ng tiyak na brand ng bakuna ang ilang mga bansa bagama’t napatunayan namang ligtas ang lahat ng mga bakunang mayroon sa bansa.
“Hindi natin sila makukumbinsing magpabakuna ngayon kung takot silang hindi naman tanggap sa pupuntahan nilang bansa ang brand na ituturok sa kanila dito sa Pilipinas,” saad ng senador.
Dagdag pa nito, “Inaasahan naman nating may humigit-kumulang na 10 milyong bakuna na darating ngayong Hunyo. Kaya kung ano ‘yung mga brand na angkop sa kondisyon o pangangailangan ng bawat sektor, tulad ng OFWs, ay dapat ma-allocate na nang maayos.”
Nanawagan din ang senador sa mga OFW ng pagsuporta sa national vaccine rollout dahil may pagtiyak naman na kinokonsidera ng pamahalaan ang kanilang mga saloobin. – Ulat ni Eunice Samonte / CF-rir
